---------
ولسانى بحن اليك
واحن كمان لجدرانك
هنا صليت هنا غنيت
غناوى كتير على بابك
هنا عنباية مزروعة
ماليها الشوك بتجرحنى
هنا ارضى اللى بازرعها
وهنا جارتى بتلمحنى
وهنا بسمه بتتدارى
بشوفها والجبين محنى
وانا بأزرع ورود الشوق
وباهديها لأحبابى
هنا واقف على بابى
وبأتكلم مع صاحبى
تعدى الحلوة يضفاير
اغمض عينى وادارى
ورا خجلى
واقول بكرة هكلمها
اكيد لازم افهمها
انا المدبوح قصاد عينها
وعينها اللى دبحانى
انا اللى كتير بأغنيلها
ولا مرة بتسمعنى
وهنا جارة تغازلنى
تقولى عنيك تلاحقنى
وانا راحة وانا جاية
وانا مكسوف ارد بأيه
دانا عمرى ما اكون ليكى
لأنى عشقتها هى
دى اجمل من بنات الحور
فى عز الليل
يبات قلبى يناديها
يبات فكرى يناجيها
تبات عينى بتتلمس خطاويها
واقول بكرة تكون ليا واكون ليها
وبكره الجاى مبيجيشى
ولو مره
نشف ريقى يا بنت الناس
وانا الحارس على المية
منصور عبد المقصود
ليست هناك تعليقات:
إرسال تعليق