يا ظالمة

أقسمت أن النافذة قد أغلقت
وبأن نور الشمس
أصبح لا يرى
والعاهرة
تتخفى خلف ستائر
لم تحجب العورات
ظلت ظاهرة
لم يبق شيئ عندها
لم ينتفض
الا الكرامة والشرف
وبكى الجنين
على مشارف نهدها
كيف ارتويت من السموم
حتى تبدلت الغيوم
صارت تلال مظلمة
يا ظالمة

اسمحيلى اعترض

اسمحيلى اعترض

واعلى صوتى بالهتاف
صدقينى حتى لو كان اعتراضى
فيه نهايتى مش هخاف
اللى خاف مسلمش ابدا
واللى عاش مكسبش شيئ
الحياة بتضيق عليا
والفشل أصبح صديق
العلوم هاجرت عقولها
والأمل فى النيل غريق
عشت طول عمرى مصدق
كل كدبة بتكدبيها
وأما كنت اشكى لقلبى
قلبى كان دائما يخون
ولما اعاتبه كان يقولي
اى شيئ فى الكون يهون
إلا ضحكة من عنيها
اضحكيها مرة ليا
كل ضحكك كان عليا
وأما كنتى بتحتاجينى
تبقى محتاجة لضحية
مرة محروق جوه قطر
ومرة غرقان فى السفينة
حتى لو شجعت كوره
برضه بتضحى بعنينا
وأما أبكى وأقول ف عرضك
تغضبى منا وعلينا
وتغضبى وغضبك ينادى
حسوا مرة يا خلق بينا
منصور عبد المقصود

هتصدقينى

هتصدقينى لما اقول
زعلك حبيبتى يهمنى
يا مزعلانا فوق حدود كل الزعل
يا مكسرة فينا الامانى والامل
وايه العمل لما تكون الشقلبه
منهج لأحياء الامم
واما تكون الفهلوة
ميزان ومعيار الزمم
حبة رمم
يتحكموا ف كل البشر
زى القرود مالهم عدد
بقت الحدود من غير حدود
والدود بينخر فى الجتت
ملعون ابوك يللى الفشل
قدام عنيك منهج حياة
لو شفت ناجح تقتله

مشيت

مشيت فى مشوار الحياة
ملقتش غير ضلى صديق
ف جريت ادور ع الطريق
رمالى ضلى طوق نجاه
قال الحياة مبتدى صالح مبتغاه
يا تكون حويط
يا تكون محيط
قلبك يساع الاوبئة

فى يوم ميلادك يا نبى

فى يوم ميلادك يا نبى

مليون ملاك
مستنظرين لحظة
ميلاد المصطفى
المجتبى خير البشر
تبكى البلابل والشجر
جاء البشير المنتظر
خير الورى
هادم نواميس الملوك
ملك الملوك
رافع مقامك يانبى
عليت باخلاقك امم
وحرقت اسواق العبيد
والعدل ساد كل الزمم
يبكى الحجر
لما القلوب
تصبح حجر
لحظة ميلادك يانبى
كتب التاريخ اتبدلت
واتحولت
لغة الحجيج
الله اكبر يا نبى
يسقط هبل
ولا لات وعزى
دين الكرامة والعزة
نازل مع وحى السما
يا قلوب بكارة وطيبة
وقلوب مشايخ نابها الصبى
وعبيد فى حضرة حضرتك
تصبح اسود
والعدل اللى ف منهجك
اصبح يسود
صلى عليك كل البشر
صلى عليك حتى الحجر
وبكى عليك جزع الشجر
فى يوم ميلادك يانبى
الكفر غار وسط
الفيافى وانتحر

حكاوينا

حكاوينا كتبناها بدمع العين
مشينا كتير ومش عارفين طريقنا منين
طريق الحق مش واضح
كأن الحق شيء فاضح
طريق الشر متمهد وموش راضى
يفارق قهر خطاوينا
على عنيكم بتتزيف حقايق واضحة قدامكم
ومين ايد العيال نسرق
امانيهم وأحلامهم
وسكة طويلة قدامهم
لكن لساها مش واضحة
منصور عبد المقصود

ابى

لميت ف كيس ابيض مبادءى كلها
وربطت كيسى ف جعبتى
الكيس وقع
ضاعت المباديء
معرفش حد يلمها
ونزلت أدور ع اللى راح
بس اللى راح
خلانى أشعر بالجراح
فجريت على قبره الجميل
القير مال
ورفض يبص ف خلقتى
يا قسوتك ياقبر
لو كنت تعرف مين اللى نام فى حضرتك
صاحب المبادىء كلها

بنت الفلاحة

بنت الفلاحة
البت الابسة على دماغها اشارب
وتشوف منظرها تتألم ويجيلك كرب
البت اللى مصاحبة الفجر
تصحى معاه
وبتتكلفت قبل سواد الليل
البت اللى بتشبه طمى النيل
الأرجل من مليون شحط
لو شفت الماشية تقول راجل
وفى بيتها ست الستات
بتخلف صبيان و بنات
متخافش عليهم من الدنيا
عارفين أن الدنيا دى فانيا
وأنها شيء ابدا ما يلذ
البنت اللى مصاحبة البقرة
وتصحح للواد لو يقرا
والفاهمة السنة
وبتقرا فى كتاب الله
البت اللى بيسخروا منها
مع ان عيونهم شايفينها
فى الارض ايديها مع راجلها
يعزق تعزق
يحرث تحرث
يحصد تحصد
طاحنة القمح وتخبزه عيش
وان زاد ع الحد
تعمله قراقيش
والسمنة والجبنة قريش
صنع اديها
عينى عليها
البيت عمران
علشان فيه ست الستات
الراجل يرجع من غيطه
لو شفته تقول ده السلطان
واقفله ودايما ضحكاله
ولا عمره يشوف لوية بوزها
اه يا بخته اللى يكون جوزها

كأنك

 ب

كأنك بتعشق ميلاد الصباح
فى قلبك براح
يساع الامانى يساع البشر
ومش منتظر
تنول الاغانى ويعلى الهتاف
وصورتك تنور فى وسط الغلاف
كأنك بشر
ميعرفش يخدع ولا يوم يخون
ولا يوم يداهن
كأنك شجر
وطارح ثمار
بتشرب جزوره من السلسبيل
كأنك نخيل
وطارح شفا
كأنك حضارة وليك الف عام
تعيش ع الدوام
مرافق تاريخك تاريخ النضال
كأنك قمر
وحارسك نجوم
تدور فى المدار
بتهدى اللى عاشق
ساعات السهر
كأنك مطر
بتغسل بنفسك
ذنوب البشر
وتشفى العليل وجرحه الكبير
كأنك ملاك
ما تعرف ذنوب
ونفسك فى توبة
تساع البشر

لحظة ميلاد الفجر

طبع البشر محكوم بطبع الحاكمين
فى شعب يموت لانه حر
وشعب يموت لو يبقى حر
وشعوب بتحييها الامانى
بس الامان
ى متاخده منه إغتصاب
ابوجهل تسمع كلمته
فتقول عجب
ابو جهل غرقان فى الادب
ف كلامه رمز الاحترام
بقى مش حرام
انك تبيع اللى اتبرى فى حبها
وبيسئلوك مين السبب ؟؟
تدارى ورا ضى الكلام
تلقى القمر خجلان
قلقلان
ل الفجر يكشف قصته
الصبح شقشق فى الميدان
رفض الادان ينتظر لحظة ميلاد الفجر
الليل طويل
والعتمة ضحكت ع القمر
وقت الخسوف بقى سرمدى
وانا لسه عمرى بيبتدى

رجالة حريم

تكون قاعد مع صحابك
على القهوى
يعدى كبير ويرمى سلام
تقوم له قوام وتحنى الراس
تقوله يا باشا على راسى
يا تاجى وعزوتى وناسى
مشاريبك على حسابى
يا اغلى الناس
حرمت البنت م الكراس
عشان تشرب حجر شيشة
بتحبيشة
عملت كبير قصاد الناس
وبنتك نايمة عريانة
ولا هدمة بتسترتها
كتير البنت سقعانة
تقولك يابا عاوزة كتاب
فتخبطها على راسها
مفيش احساس
اهج ناس
تسيب بيتك ومتأريف
دماغك عاوزة تتكيف
تبوس الايد
ومليون ايد عشان كيفك
مراتك مره خياطة
ومره فى خدمة الباشا
يناغشها ‘يناوشها
لكن سناله خرابيشها
تعيش صايناك
عشانها فى الاساس حرة
مخانت حتى لو مره
مع ان الحياة مرة
تقول بكرة مصيره يعود
بتزرع فى العيال بزرة
واصل البزرة خربانة
لكن صابرة وع الاخر
يشوفها الصبر يتاخر
فبيكيلها بدمع العين
حريمنا فى الاساس راجل
ورجالة اساسها حريم

لا عدل ولا انصاف

لا عدل ولا انصاف
ولا اى شيء ف الكون
اللى انكوى بالنار
يتقال عليه فرعون
ويزم فيه الندل
ويقوله اى كلام
يللى غواك الادب
الله يكون فى العون
الحد بيكتفك
وبتتحكم بحدود
والحر لو ينصفك
يهجم عليه الدود
الصدق هجر الحناجر
والدمعة مصنعوعه
تسمع ادان الفجر
تدعى يا رب تعود
فرحة لقا الاصحاب
يا رب دعوتنا
وقفت على الابواب
اسمح لها تعبر
وتعدى من بابك
احنا اللى قد القول
لكن بيحكمنا الادب
اكفينا شر الخصام
شر الملام والعتب

يوميات عجوز

يوميات عجوز

وجريت عشان اصرف دوايا
لما ملونى بالمرض
قالوا بان المفترض
تثبت حضورك وانت مين
وانا اللى جاى وبجتتى
لكن قالولى اثبت لنا
لو كان يحق
تصرف دواك من عندنا
طلعت يمكن 100 روشتة من الطبيب
قالوا يا عم الحج عيب
وقف هناك اخر الطابور
واحنا بنكشف ع الاسامى بالندا
ولما طالت وقفتى
خانتنى رجلى واتنت
جابوا لى كرسى وقالوا اصمد وأنتظر
وبعد ما اليوم انتهى
ملقيتش اسمى بيتنده
وقالولى بكرة هنخدمك وهنندهك من غير طابور
احنا بتحكمنا الساعات ووقتكم والله خلص
وانتم بيشفيكوا السكات
عقدوا لسانى فاتخرس
تانى يوم بنسمع فى الجرس
نده على اسمى الطبيب
وحكيتله عن مرضى العضال
وبسرعة قلعنى وكشف
وكتب روشته فيها أصناف العلاج
وقالى أمضى ع الورق
والله و مضيت
فين البطاقة يا محترم
طلعت من جيبى البطاقة
قال لى البطاقة تاريخها باين منتهى
سيب العلاج وبسرعة جددلى البطاقة
طب بس يا بنى ادينى علية م العلاج
قالى عاوزنى اتحبس
والا عاوزنى يضيع كمان مستقبلى
يرضيك يا عم انى اترفد
لا والله يا بنى ميرضنيش
موتنى يا بنى عشان تعيش
انا كنت فاكرنى بساوى
فقالولى انك متساويش
علبة علاج
وجريت عشان اعمل بطاقة
قالولى انت منين يا خال
مصرى وعنوانى بسيط
قالولى غيرت الاقامة
اقامة ايه ؟؟
يا عم قولى اعمل ايه
قالولى طب نعرف منين
ان بياناتك صحيحة
لو ليك معاش
اطلع على التأمين وهات الاستمارة
وامضيها من عبد الملك
وزين ابوها بختم نسر
نعرف بأنك لسة حى
وساعتها نعملك بطاقة
وعبد الملك ابو كرش واسع
فتحلى درج وقالى اهلا بالادارة
انا قلت اهلا يا بنى بيك
قالى يا باشا افتح عنيك
وانا عمرى لو كان انتهى
لسة عيونى مفتحة
نفطر يا عم الحج وهننده عليك
امشى يا بنى
لأ خليك منتظر
عشرين جنيه باقيه معايا
فى الدرج حطيتها بايدى
الختم زغرت ع الورق
وجريت على بتوع البطاقة
خدوا منى اوراقى السليمة
وقالولى بينا نصورك
كتبولى ورقة وقالوا بعد اسبوع استلم
اسبوع وعدا والمرض بيهدنى
خدت البطاقة وقلت ادونى الدوا
قالولى عيب يا عم الحج وقف فى الطابور
اتعلموا شوية النظام
يا شعب عيب والله حرام
امتى بقى تتقدموا
يا شعوب بقى اتعلموا وحبوا النظام
فشكرتلولحسن اموت
لو بس مش خايف اموت لشكرتلو
منصور عبد المقصود

فاشل

ولأنه فاشل فى النفاق
والنفس عمره ما زلها
ولانه افشل فى الرياء
عاش الحياة على قدها
يا نفسى دارى لهفتك لا
تحلمى ابدا بخير
البغبغان دبح الكناريا
وقالها مانا برضه طير
دم الكناريا نازف شموخ
على صدرها
الكون بدونه صبح نشاز...
لكنه جازللعندليب
حط الورود على قبرها

قهوة الشعراء

النجع شاعر خد جمال
على ركن هادى
واتصل بالنجم جاله
كله كان يشكى لحاله
عدى اكرم بالسلام رافع ايديه
النجم قاله
فين يا اكرم
بعدت ليه
اما حاتم رد قال
البعاد مكتوب علينا
والحبايب يجرحونا
واللى عاملينهم صحاب
يوم بضحكة
والف ليلة بيدبحونا
رد اكرم
قال لحاتم كنت فين
والمعاد اللى ما بينا
ليه نسيته
الف رنه من جهازى
يا عم رد
شيش وبيش
ينده على الطاوله حسين
منصور يقوله كفايه تقرص
قرصت مره ومرتين
القشاط ناقص تلاته
قول القشاط خبيته فين
ابو عيلة يضحك بالقوى
حسين وعامل فهلوى
احنا اللى حطينك حكم
وكأنه وارث من حسين
والنجع باصص من بعيد
تعبان بيكتب فى القصيد
والنجم محتار فى الرسايل
كل لحظه الف رنة
وكأنه فاتح سنترال
وليد عمر جاى من بعيد
بس صوته مش سعيد
شافه كل الموجودين
قالوا والله الليلة عيد
اهلا وليد السكرة
مش برضه تحت السيطرة
يصرخ وليد
الناس فى وشك لبسه وش
ومن وراك لها الف وش
تسقيها سكر وبأديك
ترد لك الطعم مش
ابن البلد حسب الميعاد
ومعاه فرج بالميكروباص
يلا يا شعب الفنانين
هدى نور مجتش
تلاقيها قاعدة فى الحجاز
حجت خلاص
لأ دى الحجاز فى القاهرة
الليلة ندوتنا هناك
الدكتور احمد من بعيد
بيصرخ من الفرحة سعيد
هروح معاكو القاهرة
وهقول قصايدى الثائرة
ملعون ابو اللى يقولى هس
كل اللى قاعد قام وقال
ملهاش لزوم القاهرة

فوق القنال

على النسيم فوق القنال
المركبة ماشية
رافعة العلم والسارى قام
يرقص من الماشية
يا عم قبطان عينك
على الشارع
حاضن بجنحاته القنال
والخطوة بتسارع
قلب الفنار دايب دوب
من رقصة الرفاص
شافه النسيم قال والله حق
انى اشتغل غواص
ده الغوص على جبينك
نجاه ينقز من الغارقة

ولحد امتى ؟

ولحد امتى هتنحنى .؟؟؟
ضهرك صبح كله اتب
الارض واكله من عينيك
معقول يكون عنك سبب
الحر عشقه الكبرياء
والعبد مربوط فى العتب
فمعدش ينفع فيك كلام
ولا عاد يفيد وياك عتب

اكمنى واضح

واكمنى واضح فى الكلام
قالوا الكلام ماسخ
لو كنت بس تزينه
تلقى البيان راسخ
ضميرك اللى بيوجعك
انسى طريقه منين
الحق طويل الامد
والباطل عايشله يومين
قلم الشيطان منسوخ
والحق ظاهر وناسخ

الفقر

الفقر 

الفقر طار عشش على رأس البشر
والكوسة صبحت منهجى وزرعى انتحر
وخيارنا أصبح ميت خيار
لفيت على بيوت الغلابة
كانت ملايكة تزفهم
بس الشيطان زرعه انتشر
ما لقيت بيوت
حكم الطاغوت
ان اللى يتنفس يموت
لكن طالوت
حب الحياة
وكتب نواميس النجاة
ما بين طاغوت
وما بين طالوت
كام بينا ظالم وانتصر

ولانه صاحب

ولانه صاحب
بيسوى عندى الف ضى
تقولوا ازى
اللى بينا مش مصالح
اللى بينا شيئ وصالح
للعوام
اللى بينا احترام
اللى بينا شيئ ما يوفيه الكلام
قالوا طيب
والطيبة مش وصف اللئام
والاحترام عمره ما كان شيئ مكتسب
نطفة مزروعة ف صاحبها
من بيوت المحسنين
الابتسام
يعشق وشوشهم
عمر ما فى شيئ يحوشهم
او يلوث دربهم
مبيخافوش غير ربهم
تستحى انك تعيبهم
لو يصاحبك حد منهم
اوعى ليلة تخسره
مهما سائك منظره
القلوب اللى بيحكمها الضمير
مش كتير

مازال الحاضر والغائب

مازال الحاضر والغائب

يسأل عنها

هل ذهبت ؟
لم تأتى بعد صلاة الفجر
اتصلى ؟
الفجر الظاهر فى العينين
يباغتنى
يؤرقنى
ما زالت انقى من ثوب تقى
هل يمشى اليوم عليها تقى ؟
اتقى من يعلو بغى ؟
يتوضأ فوق نجاسته
من حوض يملئه الحيض
كى يعطى صكوكا
تغفر للقاتل كل ذنوبه
وتنقى من قلب العاصى جل عيوبه
ما اشقى ان تسمع شيخا
يمسك بيديه اليمنى
صليبا معكقوف
ما اتعس ان ينطق قاضى
يحكمه الخوف
فيقرر ان القاتل
يقتل حين يعانق بأسم الرب
ويعلل ان العاشق يقتله الصب
فى وطن يحكمه النرد
لن يعبأ احد بصراخ
قد يقتل )باخ ) او يقطع من يده وترا
قد يتدلى من قدميه
حين تغنى فاتنة المعبد
لحنا لم يألفه النرد
مازال الغائب والحاضر
يسأل عنها
هل ذهبت رغم اراداتها
لتعانق نجما يتدلى
ما بين هلال والارض ؟
مازال المسجون طليقا
يحمل اصفاد بين يديه
لكن الاصفاد لا تقتل حر

المشكله

لا تلبسى توب الوجع
فاكرة اما رحنا المنتجع
وبنينا بيت كان من تراب
يللى انت عاشقة البحر
انا شايفك سراب
معجون انا بماء الحنين
يا كاتمه فى الصدر الانين
يا شايله انات السنين
كان قبلى مين
جاى بعدى مين
يا طريق ومفروش بالورود
للعاشقين
يا بايعة للى بيشترى
والشارى مين
شهدك دة موصوفلى انا
ولا دا حق المغرمين
انا اصلى قلبى اللى اتوجع
وصبح حزين
عايشة الحياة لعب وسهر
كل اللى شايفك منتظر
دوره فى ضحكة وكلمتين
وبتزعلى لو حد قالك
رايحة فين او ويه مين
ومعدش فى الدنيا الامين
اللى يصون الجوهرة
عايشة الحياة ومتصوره
ان الحياة من غير قيود
كارهه المبادئ والحدود
عاشقة الدلال والنغوجة
انا عمرى ليلة ما كنت عاصى
وللمعاصى بارتكب
انا كنت عاوزك
بنت تسوى الف واد
انا عمرى ما تصورت
ان الخير معاكى الابتعاد
لكن بقولها ومنتظر اخر معاد
المشكله
انك حقيقى مصدقه
ان اللى بينا شئ كبير
كل اللى بينا
كان حكاوى وقلتها
لغيرك كتير

طب مين يحبك قدى انا

طب مين يحبك قدى انا
وانا اللى ضربك بالرصاص
طب مين يصونك غيرى انا
وانا اللى بايعك م الاساس
طب ليه يا حلوة تصدقى
انك قتيلة مبدأى
وانا مبدأى مات واندفن
مالقيت على مقاسه كفن
مدفون بقاله كتير زمن
مستنى لحظات الخلاص
انتى اللى عايشة بمبدأئك
وانتى اللى بتموتى عليه
طب بس ايه بيزعلك
مغبونه ليه
خايفه على تراب الوطن
مبقاش فى وطنك غير تراب
وطن العجايز
ميموتش فيه الا الشباب
وعوجيزنا بس بيحكموا
وهيعيشوا على طول يحكموا
حفنة تراب
موتك بينضاف للعدد
واحنا ما فينا غير عدد
مدد يا خلق الله مدد
درويش وداير يحكى حكاوى المعتصم
ندهت عليه من حبسها
حالف ليكشف وشها
كلب الرومان
الالعوبان
يا ريتنا عيشنا من زمان
وعاش معانا المعتصم
اخر الحكاوى
المعتصم
الليلة مات
لكن ما عاش من خلفته الا البنات
بس البنات مقدرش كلب يمسها
جادت بناتنا بنفسها
لحد ما تصحى الرجال
منصور عبد المقصود

ورفعت راسى

ورفعت راسى
فوق حدود الامكنه
ولعنت كل الازمنه
لما لقيته فى الافق
نجمه يفوق نجم السما
ولقيته فى الشاشة الازاز
فارس وراضع م البزور الطيبة
ولما استوى
لقيتنى ضهرى بيستوى
بعد ما كان ضهرى انحنى
مليون شنب
ما يساوو شعرة من شنابك
مليون دكر ميخلفو زى اللى جابك
بعشق جنابك
لما رديت اعتبارى
ولما عليت المقام
ودخلت صليت ركعتين
حب وكرامة لربنا
يا رب شاكر نعمتك
يا رب اسف
ان كنت يوم
ابديت عتب
ندمان
بقطع
فى الغناوى والخطب
ومن غير سبب
شفت العويل
على خدى نازل بالقلم
وانا عمرى جوعى
ما هزنى
وانا عمرى فقرى ما هدنى
لكن بيقتلنى الادب
انا كنت عالم لما كانوا بيبصموا
انا كنت عادل لما عاشوا ف خدمتى
يا ربى سرقوا لقمتى
وهما اللى خلقوا محنتى
طب مين يترجم قصتى
وانا قصتى متكرره
طب مين يرجع بسمتى
وانا بسمتى مدفونة
من كام الف عام
كل المخاصى بقت ملوك
وشعبنا صبح العوام
من الف عام
مستنى فارس يحكمك
من غير شنب
يمكن يكون سر المهانة
كتر الشناب
من الف عام مستنى
فارس قالوا جى
مبييجى غير بس الفرس
يا شعب غرقان فى الخرس
منصور عبد المقصود

حِلم الحمار

طب مين يحل المسألة
والمسألة مش ناقصة حل
والمسألة ...
حِلم الحمار
الليلة جايه الترقية
والترقية
اسبوع تعيش ويه البشر
رقص الحمار من فرحته
وعشان حمار
لف الشوارع كلها
سلم على كل البشر
خمسين حجر
جايين على وش الحمار
جرى ايه يا عالم للبشر
دى عقولها انشف م الحجر
صغار وضربوا بعضهم
زعلوا الكبار
وبيوت تمطر بالحجر
خاف الحمار على سمعته
هرب الحمار من وقفته
يجرى ويسبق دمعته
شافه حمار شبه عليه
قاله حبيبى بتجرى ليه
هات من حمولك
فوق كتافى وحمله
خد من عشايا لو تجوع
لكن دموعك
ع الحمير غالية قوى
فكفاية تبكى
عيونى منك دمعت
الكدب من طبع البشر
والظلم من طبع البشر
والكبر من طبع البشر
والصبر اجمل طبعنا
ادعى وصلى لربنا
وبعلو صوتك قوم وقول
يا رب رجعنى حمار
وان يوم طلبت الترقية
احشرنى ويه الاشقيه
منصور عبد المقصود

الحمامة والغراب

العباره
الحمامة اخر لطافة
والغراب مليان سخافة
الحمامة شكلها
دايما نظيف
والغراب شكله
واكل م الكنيف
الحمامة واكلة حَبْ
وساعات جوافة
والغراب مياكلش
ابدا غير جيافة
الغراب واقف
يغنى للحمامة
عمال بيوصف حسنها
واقف يصور جسمها
الحمامة بنت ناس
والغراب ملهوش اساس
الحمامة كل يوم تعطف عليه
وعطفها
اتصوره كان حب ليه
ساق دلاله وقالها
كنتى فين
طب ويه مين
الساعات عدت سنين
الحمامة قالتله ايه
طب وانت مين
انت اخر شيئ فى عمرى اتصوره
انت شيئ يتعبنى دايما منظره
قطة جايه من بعيد
تستخبى فى الشجر
الغراب شايفها جدا
بس قاعد منتظر
اكلت القطة الحمامة
شافها الغراب راح مبتسم
واللى باقى م الحمامة
سابه حتى ما ادفن
لما جاف الباقى منها
فرح الغراب
اكل الوليمة وابتسم
هى دى كانت حكاية
الحمامة والغراب
مين هيبكى ع الحمامة
ومين هيفرح للغراب
منصور عبد المقصود

انت القصيدة

الكلام لساه بيرقص
لما يسمع حرف اسمك
والكناريا جت تغنى
لما شافت رسم جسمك
انتى انثى بالف انثى
انتى انثى تاعبنى وصفك
يا جميلة والجمال
غير ملامحك
كنتى سمرا والا بيضا
مافتكرش
انى يوم بصيت ف وشك
كل حبى كان لروحك
كان لقلبك كان لنفسك
الوشوش بتدوب يا غالية
واللى باقى لروحى قلبك
مش بقلك
انتى احساس القصيدة
لما يملاها الوجع
انتى روح تعشق جروحى
لما تلمس طرف يدك
كنتى عاوزة كل حاجة
وكنت عاوز حتة منك
كنتى عاوزة كيان واسرة
وكنت عاوز بس قلبك
كنت عاوزة امان وفرحة
وكنت باحلم انى جنبك
كل احلامك جميلة
وحلمى واحد
روحى تفضل جنب منك
انتى خليتى القصيدة
شيئ عجيب
تبكى بدموعها الحروف
لو فى يوم عنك تغيب

• 

إبن الشوارع

إبن الشوارع

وإمتى يادنيا هتحنى
علينا فى يوم
وإمتى هنام وهشبع
نوم
وإمتى هعيش بقى انسان
وامتى يا دنيا هتعلم
وامتى يكون لنا حاضر
ماهوش زنبى
ان ابويا يموت
وامى بعده تتألم
وتملاها الحياة اوجاع
وتبكى ع الولد
لو جاع
فتتجوز
عشان اللقمة تلقاها
فيضربنى
وانا اللى
ابويا طول عمره
مكرمنى
انا غلطان لانى هربت
يوم م البيت
لكنه كان بلا رحمة
وامى ست غلبانة
بتتكلم
عليها الكف بيعلم
واعيش فى الحسرة
باتألم على امى
وعلى بيتى
وعلى نفسى
كرهت العيشة
من يأئسى
بقيت عايش
منيش عايش
فى ليلة بأشحت اللقمة
وليلة بجيبها بخناقة
يا دنيا لينا خّناقة
واصل الناس
مهيش فايقة
واصل الناس
مهيش رايقة
تحن فى ليلة ع الغلبان
مدام غلبان
كتيره نبص له بصة
ونتأزم
نخاف ليبص فى اللقمة
فتتسمم
عرفت كثير
وصاحبونى كتير اولاد
حالتهم برضه
من حالتى
نومتنا اصلها الشارع
بنسمع كل فترة ادان
وناس رايحة وناس جاية
ونسمع من الشيوخ قرأن
وناس واقفة وبتأمن
واروح واجرى على الجامع
فشيخنا يبصلى بصة
يقولى روح على الناصية
يا ابن ال ...... (ناس )
فقدت يا دنيا احساسى
بقيت انسان بلا احساس
بلا مبدأ
لقيت كل البشر اعداء
وكل الدنيا اعدائى
وليلة لقيتنى بأتالم من الاوجاع
وبصرخ فى الوجود صرخة
اتارى ملاك
ومتخفى فى توب انسان
واقف على ضهرى بيطبطب
نسيت اوجاعى على ايده
على كتفه كأنى غفيت
وقلت يا ريت
عرفتك من سنين فاتت
على بيته وودانى
واول مرة احس انى
بقيت شبعان
وكلمنى
وعلمنى
وقاللى الدنيا مش اسيا
لكن احنا اللى مش عارفين
نعيش فيها
ده لو تتعب حبيبى ف يوم
تلاقى الف يوم راحة
فعيش فى الدنيا براحة
على مهلك
وحاول بس تتعلم
فتاكل من عرق ايدك
يوميها المولى هيعينك
وتصبح بكرة سيد الناس
وخدنى يوميها ع الجامع
وصلينا
وخلصنا الصلاة دعينا
يا رب الملك والملكوت
انا عبدك وده ملكك
فأعطينى واكفينى شرور الناس
وعم صليب راجل حداد
اخد ايدى وعلمنى
وشربنى بأديه صنعة
وبعد الشغل بأتعلم
وصبحت ورشته بيتى
تعدى سنين كتير ياما
بقيت انسان صاحب صانعه
وبأتخرج من الجامعة
وكل الدنيا ضحكالى
وبقيت اضحك على حالى
واقوله يارب انا شاكر
ولا عمرى هعيش ناكر
لفضل الله
لكن فى القلب فى غصة
انا مشتاق ولو بصة
فى عين الغالية ست الناس
تعالى يا امه ف احضانى
انا اصبحت شيئ تانى
ومحتاجلك
اكون جنبك
انا يامه حبيب قلبك
خدتنى الدنيا
لكن عمرى ما نسيتك
تعالى ونورى بيتك
يا رب الكون انا عاجز اقول شكرا
وشكرا مش كتيرة عليك
كتير زيى هنا كانوا
لا ليهم اهل ولا مأوى
فكون ليهم
وامنحهم قلوب
غرقانة فى التقوى
تنجيهم
وكون الرؤية لعنيهم
انا اللى بديتها فى الشارع
بفضلك صار لعينى طريق

• 

انا ضد

انا ضد
لا
انى مع
يا كل حاكم
امعة
فانا الذبيح
على المزاهب
الاربعة
لا تحسبوا
انى غريق
فالبحر اسدل
ادمعه
انا
ما تجاوزت
الفصول الاربعة
يا ايها الشيخ
العتيق
ما زلت تبنى
الصومعة
يا ايها القاضى
السحيق
افهم كلامى
واسمعه
انا لست ضد
ولم اكن يوما
مع
يا كل حاكم
امعة
منصور عبد المقصود

مقتول

مقتول انا
قبل الحياة ما بتبتدى
مقتول انا
والدمعة قاتلة والدى
مقتول
عشان حبة كراسى زائلة
مقتول انا
يا زبيب على سجاد صلاة
مقتول
عشان سعرى الرخيص
وعروبيى كانت تهمتى

إهداء

اهداء
متيجى نقول كلام
يمكن
كلامنا يكون فى يوم
ممكن
فممكن منه نتألم
وممكن برضه نتعلم
ويمكن كل شيئ جايز
فجايز إننا نحلم
وجايز حلمنا مرة
نقوم نلقاه بيتحقق
متيجى حبيبى يوم نحلم
مدام الحلم مش ممنوع
ولو ممنوع
تعالى نِدَارى احلامنا
وندّارى فى ضى الليل
تعالى نكلم المواويل
فتهدينا بكام موال
تعالى ودارى احزانك
انا اللى العمر علشانك
بعيشهولك
وانا اللى غزلت توب الفرح
على نولك
فليه يا حبيبى تمنعنى
اكون جنبك
فليه وانت اللى علمنى
الهوى حبك
بتنسانى
وانا اللى حلفت
يوم ما انساك
وانا اللى لقيت
حياتى معاك
ده لوتطلب حبيبى النور
اقيدلك من صوابعى الشمع
ولما تبات فى يوم مهموم
ميخلص من عيونى الدمع
انا اللى عشقته فيك إنسان
فكون يا حبيبى إنسانى
وإوعى فى يوم لتنسانى
فتهرب منى احلامى
يا اجمل حلم
شفته حقيقة قدامى
منصور عبد المقصود

التاريخ مصرى

قوم يا تاريخ النضال
واكتب عن المصرى
سجل بطولة شعب
واكشف عن الصورة
عمال بيحفر بأيده
نتج القنال حصرى
حفرها الف الف
يعنى العدد مليون
مات فيها ميت الف
والمولى كان فى العون
الارض شربت دماهم
صبح القنال شريان
والنصر كان نصرى
جدك يا مصرى حفرها
وغير مصير الكون
وقف التاريخ لحظات
والمصرى قال كلمته
الجيش حماة الوطن
فارس على جبهته
فى الحرب نار ودمار
على كل مين يعاديه
وفى السلام البنى
شاهد على حكمته
المصرى طلب المدد
علشان ما يبنى السد
الغرب قال كلمته
ما بندى مالنا لحد
ايه العمل يا جمال
والكل بيحاربك
قال العمل فى ايدين
اللى عشقها بجد
واللى فى عز الليل
بيقوم يغنيلها
المصرى ايه غير كرامة
شاربينها من نيلها
تأمم قناة السويس
وترجع لحضن الام
والسد راح يتبنى
لو يتبنى بالدم
واللى يشق القنال
حفيده يبنى السد
وقف التاريخ لحظات
بيجهز الصورة
المصرى قال كلمته
هبنى قنال تانى
والمصرى لما يقول
على كلمته حاسب
ماسك التاريخ القلم
يكتب عن المصرى
كتب التاريخ كلمته
طلع التاريخ مصرى

كان يحكمنا ملك

قالولى جنة ربنا

قالولى جنة ربنا
منتظرة اهى موتك قوم يا شهيدنا الحى
نسمع صدى صوتك
ارفع سلاح التقى
فى وش احبابك
والحق صلاة الفجر
واوعى الصلاة تفوتك
شفت العدو واقف
حارس على ترابها
حارقة جبينه الشمس
واقف ولا سابها
يا عاشقين الضل
ضليتوا ليه الناس
واقف الولد صوام
شامخ كما جبالها
يا شعبنا المدبوح
قاتلك ومقتولك
اتربوا على ارضها
ولا سكنوا فى قصورك
يا غاندى ليه الناس
ثورتها عاشقة الدم
بلاها ميه وزاد
منحب بعض اهم
بالحب نحصد خير
والخير علينا يعم
يا قس فى القداس
اخطب فى احبابك
ربك محبة ونور
واقف على بابك
ملعون فى كل كتاب
يللى عشقت الدم
يا شيخ على المنبر
الكلمة دى امانة
الكلمة تقتل وتحيى
فتقولها بسلامة
انك تجاهد عدو
واقف على حدودك
الموت فدا الاوطان
مش كفر وخيانة
منصور عبد المقصود

مبروك يا ولدى الجيش عليك

مبروك يا ولدى الجيش عليك
الجيش يا واد مصنع رجال
على كل حال
ان كنت راجل
اكيد هترفع راس ابوك
وان كنت واد
هيربوا هما اللى جابوك
الجيش غنى
اوعاك تقول انه فقير
لو يوم تجوع
هيربوا فيك الاحتمال
حب الوطن
مبيتاقلش يا واد بمال
خليك شجيع لو حتى
نمت على الرمال
الرمل فى سوق الوطن
معلوم دهب
دافنين فى احشائه الجدود
وقف يا ولدى ع الحدود
ومعاك سلاحك واحرسوه
لو شقوا بطنك حتتين
اوعى الكلاب ليدنسوه
وطنك عظيم
وانت عارف اد ايه وطنك عظيم
خليك عظيم زى الوطن
اوعاك يصيبك يوم عطن
وتحب سين ,, وتحب صاد
حب الوطن
مهما يكون شكل الحصاد
واعى فى يوم يا بنى تخاطر
عاوزك جدع زى (ابن خاطر)
لو حتى كانوا هيعدموك
صورتك هتحفظها القلوب
سيرتك هتخلا من العيوب
كل الرجال بتموت يا ولدى
وكتير بموتهم يتنسوا
باقى الوطن
عايش على مر التاريخ
بأيدين عياله المخلصين
لو حكمه صاد
او حتى لو كان حاكمه سين

وارجعلى رافع
راسك من هناك
وارفعلى
راسى كمان هنا
وان جاك عدو
اوعاك تفر
على جثتك لو
كان يمر
اوعاك فى يوم ترفع ايدك
او تمشى مكسورة عينيك
امك وبتسلم عليك
وباعته بدموعها الرساله
يا تجينى راجل من هناك
يا تجينى ملفوف فى العلممنصور عبد المقصود

مفيش فايده

مفيش فايده قالوها كتير
ومش فاهم لها معنى
لقيت الطفل فى بلادى
شايل قلمه وكراسه
وتاعب نفسه مع ناسه
وبيحارب عشان يفهم
ويفهم ليه
ونفسه فى ايه
اكيد يعنى بيتعلم
عشان ليلة يكون عالم
يكون شاعر يكون فنان
فيوصل ليله بنهاره
ويتخانق مع جاره
ابوس ايدك توطى الصوت
عاوز انجح عاوز افلح
فيتخاصم مع الكوره
ويتخاصم مع السيما
ويتخاصم مع الدنيا
كأن الدنيا ما فيها
غير المنهج وكراسه
كأنه يا عينى بات مسجون
وناسه قاعده حراسه
وفى اللجنة
بتتساوى رؤوس الناس
تزاكر زى ما تزاكر !!
ولاد الناس
بتدخل فاتحة كراسها
هيدخل يتزنق ساعة
ومليون ايد بتكتبله
ومليون ايد تطبطبله على ضهره
متنساش
ان احنا خدامك
تنادى واحنا قدامك
نأدى الفرض والمفروض
امانة تبلغ الغالى تحياتى
تحياتى لما تتساوى
الرؤوس فيكى
والاقى اللى قليل فهمه بيبنيكى
فيبنيكى بلا اساسات
مدام علمك بقى ورائة
مدام ادبك بقى وراثة

مدام فنك بقى ورائة
مدام شعرك بقى وراثة
مدام...................
مدام..................
مدام القدوة رقاصة
مفيش فايدة

• 

وليه أنت

وليه انت اللى
بتشوف الحياة حلوة
و انا اللى
بشوفها شئ تانى
حياتك ليه عايشها بجد
وليه وياها بنعانى
ما انسان اكيد زيك
لكن زيك مفيش تانى
بتقتل كل ليلة قتيل
وشايل نعشه
على كتفك
دموعك دايمة على خدك
بترسمها كما الفنان
بتتلون كحربايه مع الالوان
ودنيانا وناسنا كتيرة غلبانه
تقول انك صحيح انسان
فيا انسان بلا مبدأ
بتعشق كل شيئ سيئ
وبتغنى على الاسوأ
انا فاهمك وانا عارفك
كدبت كتير وصدقتك
وكدبك صدقه التايه
وعاش طول عمره
مش لاقى
ينام الليل يخاف يصحى
يقوم الصبح بيدور
على كدبك
صبح ادمان
دراما حبكها 100 فنان
فيا فنان
تعبنا كتير من المغنى
وكل كلام بلا معنى
مصير الحق يجمعنا
ويمسح كل الوانك
فمتغنيش على بكرة
دى لو دامت يا سيدى لحد
لكانت بكرة دايمالك
منصور عبد المقصود

• 

واتعلمت الغنى

واتعلمت الغنى
على ايدين الرجال
وبقيت انا مش انا
وساعتها البخت مال
وبغنى للحرامى
وبقول عليه شريف
وبغنى للحسالة
وبقول عليه نظيف
واللى بيدفعلى ابوسه
ولو يمنع عنى ادوسه
وبقيت صاحب مبادئ
وهفتح مدرسة
وهلعن ابو الدكاترة
وكمان الهندسة
مدرستى حلوة خالص
مش عاوزة علام كتير
اول مبادئها انك
تكون كذاب كبير
يا صاحب المبادئ
ابعد عنى لأنشك
يللى عندك اخلاق
اوعى تورينى وشك
محتاج الاقى ناظر
وياريت كمان مدير
مش فارقة ايه علامه
ولا غنى او فقير
اهم حاجة انه
فى خصام ويا الضمير
افتكاسة ... منصور عبد المقصود

وخلص معاك كل الكلا

 









وخلص معاك كل الكلام
وعرفت إنك محترم
عندك وبس
بأهديك يا صاحبى
100 نصيحة
يمكن تحس
الأحترام مش إنى أقول
أنا محترم
الأحترام إنك على عيوبك
تجس
الأحترام إنك تكون
رمز الوفاء
إنك تناضل
م الرياء
لو كان يطول عمرك
يا صاحبى
بالله عليك
تعيشها راجل
مش مرة راجل
وألف مرة الاقيك وفاء
صدعتنا بأنك كبير
وكتير تقول
إنك أسد
خايف عليك
أنا م الحسد
والناس عيونها مترصده
لو كان بأيدى
أبخرك
ومن كل عيب أنا أطهرك
صعبان عليّ منظرك
وسط الرجال
بتقول على نفسك أمير
والناس تقول أنك ...وال
طب سيب شويه من
الرصيد
يا إزاز ومتدارى
فى حديد
خايف تكون إنت الوحيد
عينك تراب
صعبان علىّ الميه
فى إيدنا بتجرى
وإنت اللى عينك
شايفة ميتنا سراب

يا ثورة امتى هتختشى

يا ثورة إمتى هتختشى؟
يا ثورة لسه بنستلف
حق الدوا
يا ثورة لسه الشعب
واقف فى الطابور
لسه الحرامى
بيمص دمى وينتشى
يا ثورة ملعون
اللى جابك عندنا
رجعى دم الولاد
ورجعيلنا حلمهم
أو رجعيلنا حلمنا
يا ثورة غورى عننا
سايقك غراب
ملقيتش فى
وجودك بُنىّ
ملقتش فيكى
غير خراب
يا ميت خسارة
ع الشباب
يا ألف دمعة
فى البيوت
يا دم طايل
كل باب
يا غمامة سودا
فى السحاب
والدنيا بتمطر غضب
يا ثورة مين ميت
ومين مقتول
قابيل راجع
بسيفه يجزنا
والا هابيل زاهد
فى حب الكون
يا ثورة مين غالب
ومين مغلوب
كل البيوت ملفوفة
فى توب السواد
كل القلوب حيرانة
فى وصف الشهيد
طب مين شهيد الحق
ومين فينا الضلال
حتى المشايخ
واقفة فى الصفين
والفتنة راجعة
فى سنة الفين
وأدى الجمل شاهد
رجوع المعركة
ناس تهتف يزيد
وناس عاشقة الحسين
يا ثورة أهرب م اللى
جابك فين
طول عمرى عايش
بنتظر موتى
لا حد كاسرنى
ولا منع صوتى
لكنى طول عمرى
بخاف م الدم
رافض أكون
سيف النهاية
للى إيديه
أتسببت موتى
منصور عبد المقصود

سأرحل

سأرحل يوما يا وطنى
وسأهجر أغلى الاوطان
وسأنزع من قلبى إثما
وأقبل وجه الشيطان
سأعيش سعيدا مرتحلا
لن أشكو يوما حرمان
ففراقك يا وطنى أهون
من هجرك معنى الانسان
إنسانك يا وطنى زل
وجوارك يا وطنى قهر
وكثيرا ما يتبع حبك
قد صار شهيد الاوطان
فى وطنى لا فارق ابدا
ما بين الحاكم والرب
فالرب إذا شاء خلقنا
والحاكم إذ شاء قتلنا
ما بين إلهى والحاكم
فى وطنى خيط يحكمنا
يا وطنا أهلكنى عشقا
يا وطنا أشبعنى صمتا
أتمنى أن يأتى يوما
وأحطم كل الجدران
فى وطنى شط أعشقه
والشاطئ محمى بجدار
ما أجمل شطك يا وطنى
قد حرم على أهل الدار
وحديقة فى أقصى البلدة
أشجار ملئت بثمار
وأريكة جاءت تتأرجح
من وطئ كبار الزوار
أطفال فى وطنى تكدح
وأطفال ما شاءت تمرح
الاول أنجبة شريفا
والاخر أبن السلطان

يا سيدى

يا سيدى
إنزع قيودك عن يدى
عن معصمى
إنزع قيودك عن فمى
دعنى أشم من النسيم براحتى
جلادك يخشى أن ينام
يخشى تراتيل الكلام
يخشى حطام يسكننا
يخشى الوميض بأعيننا
يخشى الصباح
جلادك لا يهوى المزاح
وأنا أبن بسمة أمتى
هجرت عيونى الأبتسام
أبدأ كلامى بالسلام
فأنا السلام
وتلك رايتى البيضاء
انا لن أغير شرعتى
انا لن أبيع رسالتى
فرسالتى محض أحترام
تأبى جراحى تلتئم
وتأبى غير الأبتسام
كل الخطايا لك حل
وكل فضيلة عندى حرام
خمسون عاما
أسكن فى بيت أبى
أسكن قصرا
أزهو فخرا
فجدار بيتى لا تلين
خمسة كنا
وشمس وقمر
كنا نلعب
نرتع
نحيا
كنا ابتسامات
على وجه الضجر
كنا فراشات
وفرسان
وثمر
كنا حياة وجنانا
ونارا تستعر
من أطفأ الشمس ؟
ومن أبكى القمر ؟؟!
خمسون عام
و البيت يأبى أن يلين
وقد بنيت جوارة خمسون بيت
مازال يمسك بالأراده
ما زال يشعر بأنفراده
يا سيدى
كل البيوت تصدعت
ما عاش منهم اى بيت
ما زال بيتى باقيا
يعزف ترانيم السلام
ما بقيت منصور عبد المقصود

كبرت حبيبتى

كبرت حبيبتى وامها بتقولى
جاى هيزورنا ناس
يومها افتكرت اما
مشيت على اربعه
وقلت لك عندك كتافى
يلله حبيبتى اتمرجحى
مقدرتش انسى ضحكتك
امك قالتلى قوم
كفايه لتخنقك
وانا قلت يا حبيبتى اخنقى
امك قالتلى قوم كفايه هتتعبك
وانا قلت يا حبيبتى اتعبى
فاكر اما كنتى بتتعبىى
وعنيكى تتعلق بعينى
واضحك فى وشك
والوجع بيهدنى
فاكر حاجات لو قلتها
معرفش ممكن تزعلى
فاكر حبيبتى المريله
وبكاكى ع القلم الرصاص
فاكر اما رحت المدرسه
أسال هناك
وقالولى دى ست البنات
معقول حبيبتى
العمر من ايدى اتسرق
معقوله ممكن نفترق
معقوله بوسه بين عنيكى / ادمنتها
صبحت كتير
معقوله ادخل غرفتك
ملقاش حبيبتى ع السرير
طب اغطى مين
طب مين هيسقينى الدوا
يللى انت جاى وبتشتريها بالدهب
انت بنتى اغلى من الدهب
يللى انت جاى وبتشترى بنتى بمال
انا بنتى ما يوزنها مال
يا نور عيونى مال عيونك دبلانين
الحب زارك واتملى قلبك حنين
انا كل عمرى عشته لجل افرحك
متفكريش انى ف ليله هجرحك
بس اختيارك برضه شيئ بيهمنى
فأختارى حد يكون على عمرك امين
واختارى فى الدنيا المعين
واياكى من حب الجميل الفهلوى
اختارى حد يكون قوى متهزهوش المغريات

انثى تساوى 100 جدع

ولأنها مخلوقة من ضلع الوجع
ولأنها عاشقة الجدع
وهبت حياتها لخدمته
كانت ابتسامة فى
عز لحظات الالم
كانت دفا
غزلت من الرمش الوفا
غرقت حياتهم
فى العسل الى منتهاه
الحلم صعب
لكنها
قادره تملى تبسطه
كانت له مصدر قوته
ولأنه كان عتره جدع
كان ليها فارس
الدمعه لو زارت خدودها
يضمها ضمت حنان
القلب لو يوم اشتكى
يبقى الامان / لمسة ايديه
كانت عنيه
وكانت ابتسامة دنيته
رفض الزمان غير / انه يلعب لعبته
مات الجدع وسايب عياله فى حضنها
ولانها
انثى تساوى 100 جدع
ولأنها
شبعانه مين صدر امها
ولا الف نطع يهزها
ولا الف كلب يهدها
حلفت تحقق حلمهم
صبحت ابوهم وامهم
عبرت تضاريس الحياة على مرها
يا مؤمنه ... يا ملهمه
يا معلمانا الوقفه فى وش الزمن
رفض الزمان انه عليهم يؤتمن
عمرك وجهدك
دمك وطهرك
كان تمن
مقدرش ابدا يدفعه
اعتى الرجال
يا هادمه من ضلع الوجع
كل المحال
يامبدعه فى صنع الرجال
مين بس يقدر يشكرك
فى زمن الرداءة والبدع
ولأنها مخلوقة من ضلع الوجع
فمكنش شيئ بيهمها
غير انها
انثى تساوى 100 جدع
منصور عبد المقصود

قالوا على اخوانى

وقالوا على اخوانى
وكل الشعب اخوانى
ومش كدبه
م انا اللى بصلى
فى الجامع
وانا اللى بغنى
فى الشارع
وانا اللى ضحكت
فى المسرح
وبتخانق على الكورة
تقولى الكورة اوفسايد
اقولك عين ابوك حوله
انا جارى عادل يسطا
اشوفه الصبح
ع البسطا
يقولى صباح
شريف يا اسطا
واقوله يا سيدى
احلى صباح
يشوف الوالدة فى الشارع
يغمى عنيه
يقولها يمه ناقصك ايه
تقوله يا ابنى مستوره
الهى يا ابنى يحفظكم
ويستركم ما يحوجكم
الهى يا رب تتهنى
واشوفك يا بنى فى الجنه
وينجح كل اولادك
اخوك منصور اهو راجع
وصوته هل فى الشارع
صباح الورد ياغاليه
صباح نادى على عيونك
تقولى باركت لصحابك
اقولها مين
تقولى الليله عيد جارك
م ترجع قبل ما تبارك
د طول عمر الولد سباق
م انا المتربى على ايدك
وعارفانى
انا اللى كنست له الشارع
فى يوم فرحه
وانا اللى بكيت
على امه
وانا اللى حضرت
قداسه
وانا المحسوب
على ناسه
انا اللى فى ضهرة بأتحامى