بحث هذه المدونة الإلكترونية
يا بكره وانت جاى
هاتلى معاك فرحة
تمسح دموع العين
وتصالح الخدين
عل البسمة والضحكه
هاتلى معاك شمعه
تنورلنا الضلمة
لو حتى نورها ضعيف
الهم أصبح ضيف
لكن تقيل الدم
فاقد لاحساسه
ميهموش الطفل
ولا حتى بنوته
سرحانه بتغنى
يا أمنا الغولة
وديتى فين بكره
سمعنا زغروته
فى بيوت مليها جراح
ع اللى حبيبهم راح
ولا سبش عنوانه
الورد ليه دبلان
يا بنت على خدك
مين كان زمان قدك
يا اجمل التصاوير
شعرك ده والا حرير
علمتى قلبى يغير
وأنا عمر قلبى ما حب
بس ما شافك دب
وسمعت دقاته
يا معنى لحياته
منصور عبد المقصود
لساك بتحفر فى الضمير
عمال تدور عن وطن
نام الوطن فى عيون صغار
راسمين على قلب الجدار
صورة علم
الفل اول لون على قماشه الحرير
أسود على كل اللى مات فيه الضمير
احمر بلون الدم فى عيون الطغاة
عاش الولد واهتم
يقلع جزور الهم
من فوق جبينك يا وطن
طافح على جبينهم عرق
لما اتسرق
حبات تراب
رجع التراب ممزوج بدم
دم اللى عايش يحرسك من غير سلاح
الفجر لاح
نادى الإمام
ساوو الصفوف
توابيت ألوف
مترصصين
علشان متمسح دمعتك
ملايين بشر واقفين فى خدمة حضرتك
والبدر رافض يكتمل
شايف فى بكرة المحتمل
سرطان معشش فى الأمل
قالوا العمل
ف ايدين شباب
وأصغر شبابك شعره شاب
لما انحنى
أكبر هرم
يوم ما اتوجع
فيك الضمير
افرد شباكك يا وطن
نام العطن جوة القلوب
الضحكة مرسومة على وش الجدار
علشان ميحفظها الصغار
ويعيشوا دايما فى انتظار
انك تعود
تضحك لهم
ويشوفوا فى عنيك النهار
منصورعبدالمقصود
انا انسان
وحلمى انى اعيش فى امان
وامتى يا دنيتى امتى
تحنى فى ليلة ع الغلبان
وامتى يكون لنا فيكى
صدر حنون
منيش جاحد ولا فرعون
لكن بحلم وكل منايا
اعيش انسان
اعيش انسان
وغنى الديك على سطحى
رد عليه ديك امك
لكن ديكى مهوش سافل
ولا كنش فى ليله ابيح
فربى يا صاحبى ديك امك
وقوله بلاها م التجريح
لسان ديكى مهوش عاجز
وديك امك لسانه طويل
واوعى يا صاحبى من التأويل
انا ديكى بحق اصيل
وديك امك ملهوهش مثيل
من الخسة ولا التضليل
وديكى يقوم صلاة الفجر
وديك امك متعرفلو نهار من ليل
ساعات الكلمة لما نقولها بتضايق
وبتزعل كتير اصحاب
كتير بابنا يكون مقفول ونتباعد
ونرفض تبدى اى عتاب
منيش انسان بدوب فى اللون وباتلون
واطبطب عل الكتاف يمكن
تعود الدفة من تانى
فميفوتنيش رغيف العيش
لما يتغمس
بدم الحق والانصاف
عشان الكلمة بتموت كتر اشراف
وبرضه الكلمة بتقوم طابور انصاف
رخيت الحبل ع الاخر
فقالى الصبر اتاخر
وموت ع الحق
زمان الطبلة والطبال
مهوش دايم
وعمر النص لو يكبر
مهوش قايم
ومش باقى غير الدايم
ولا دايم زمان الماسخة والماسخ
ايمانك لو يعيش راسخ
تموت انسان
ومش كل اللى قال كداب
ولا الساكت كمان فاهم
تعالى انا وانت نتفاهم
وخلي الشرع يحكمنا
بلاش نحمى اللى بيخونا
عشان تبعد اساه عنك
طالما الطبع فيه خاين
متستناش يصيبك خير
(ده لو فيه خير ما كان يمكن رماه الطير )
على سطحك
انا مملكش غير الحلم
وحلمى عشانه باتحارب
تخيل انى محلمتش اغوص فى بحور
انا حلمى يادوب قارب
يرسينى مع العصفور
لبر امان
بعيد عن حى تغريده نعيق عربان
طال انتظار الصبح فى الليل البليد
يا شمس رافضه تدوبى فيكى الجليد
الليله كانت خارجته
طب ليه تقولوا الليله عيد
العمر واقف فى انتظار
لحظة عبور
او انتصار
لحظة تدوب فيها المحن
يللى فى دينك ممتحن
الصبر ليه بيضحك عليك
عديت حدود الصبر
وعبرت فوق الممكنات
معقول يكون حق اللى مات
مدفون ف قبر
معقول تاكل من ايديه الشهد سكر
وتحلى بقه بمر صبر
انت اللى غير كل البشر
انت شمس فى وسط عتمه
واحنا بنحب المهاتما لانه هندى
احنا دود الارض يقرف مننا
محنا طول الليل بندعى لربنا
يا اله الكون فى عرضك
احمى ارضك من الطوفان
م اللى بايع واللى خان
واللى عاش عمره
الجبان
مستخبى ف شق حيط
احمى أرضك م العبيط
اللى طول الليل بيهتف
واللى ع الشاشة انطبع
خاف لا يشكى من الوجع
واما اتوجع
ملقاش ايدين تتمد له
ولا حتى عين
تعطف عليه وتبصله
ملقاش فى موته
حتى كلب يوصله
ملقاش بشر
غير اللى فى قلوبهم حجر
بحبك
بحبك حب فاق الحب وزيادة
بحبك حب مش واجب ولا عادة
بحبك فوق حدود الكون
بحبك شايلة غصن زيتون
شجر طارح بطعم الشهد تكوينه
بحبك فرحة العاشقين بخاتم
حتى لو عيرة
واشوفك جوة أصغر بنت بضفيرة
بحبك طفل خاف من بدلة العسكر
ركع قدامه ميت عسكر
وباسوا الايد
فقام يهتف
تعيشى يا فرحتي بالعيد
بحبك عسكرى واقف
بيرفع علمه ع آل سارى
تجرى دموعه على خده
تعيش الراية مرفوعة
ويفدى الراية الف شهيد
بحبك شاب اهو ماشى
وشاف الغدر وسلاحه
ب يرصد ابنك أبو نجمه
فقام يجرى ويحضن طلقة الغدار
يبدل ليله الف نهار
بحبك نار بتاكل عرش أعدائك
تسوى اللقمة لعيالك
بحبك حضن ميفرق
وجامع كل أولادك
بحبك بس مش بعرف اغنيلك
ولا بعرف اقول هرمك ولا نيلك
لكن باعرف اهد جدار مفرق بين محبينك
وابنى بيتك العالى
وأضحى بكل شيء غالى عشان خاطرك
لكن خايف أضحى فيطلع ابنك الكداب
يقول انى يا أمى عميل
وأنى بعت يوم أرضك وبعت النيل
وبعت المركبة الواقفة فى مية بحرك الأحمر
ويعشق لونك الأخضر
بحبك صحفى قام يصرخ فى عز الليل
رافض زلك... رافض بيعك
فقالوا انه وأد أصفر
بحبك ومهما يقولوا عن حبى
عمرى يا غالية ما اتاثر
