دموع عينه

بتوجعنى دموع عينه
ويوجعنى كلام الناس
ماهوش عارف
بان الكل عارفينه
وان البعض قابلينه
على عيبه
كتير المصلحة حاكمة
وعشان صاحبى
بشوف المصلحة نقمة
وعاهدته
نغير المفاهيم
ونسحب لقمة
من بق الاسد
للريم
وعشنا وعهدنا صابر
وعشت ف ضهره انا راجل
وقلت نغير الحسبة
لقيت الحسبة محسوبة
هنتلون بمليون وش
هنشرب لوئم ع القهوة
ونتغدى بطبق الغش
وعشان صاحبى انا رافض
اكون غشاش
ورافض اقبل الطعنة
لما تجينى مش م الوش
عشان صاحبى
بارفض انى اتلوث
وبادعيله ميتلوثش
عشان صاحبى
هدوس ع الدنيا
لو كانت هتدينى
بيكفينى اكون صاحب
لصاحب لو ملوش ف الغش
منصور عبد المقصود

الموت حلال

يا مروحة بيت الحبيب
كام الف واد مدفون هنا
تحت الركام
كل اللى متوضى اتهرس
عايشين حياة احلاها موت
مينجيناش غير السكوت
الموت حلال
فى شرع مين
يا مجرمين
صوت الادان
مليون جبان
ميزههوش موت العيال
وتهزه دمعة فوق جبين المصلحة
متنطوحة كل الجتت
كل الضلوع متلخبطة
يا قبر ليه حيران كدة
ده جسم مين
محمود وحنا وبنيامين
مش برضه كانوا من تراب
البحر غرقان فى السراب
وكل السفن رافضة تكون طوق النجاة
يللى وهبت الكون حياة
وخلقت فيه أشباه بشر
دمع الحجر ماشى مع صوت النحيب
مسموع لكل الطيبين
والمخلصين صبحوا اسامى ع الحجر

حلم

لو ممكن تسقينى كرامة
غدينى عزة وشموخ
ابعدنى عن عار الذل
سمعنى شدو الاحرار
يمكن بكرة يصحيك صوتى
قبل ما صاحبى يبكيه موتى
ويتألم على مر فراقى
طعمنى من مصل النخوة
يمكن لو طعمتنى اقوى
واتبرأ من اى قساوة
علمنى الاخلاق بنقاوة
قوينى اكون ضد الباطل
وأموت لو علشان الحق
رافض اغنى ف ليلة لظالم
بأرفض انى اعيش طبال
حلمى الرحلة متبقاش صعبة
بأحلم انى اعيش ف حماك
ونكسر كل الاصنام
حلمى وحلمك صبحوا كابوس
لما لقينا الناس بتدوس
على اخلاقها وعلى مبادئها
لكن لسة الحلم بيقوى
طول مانا شايفك واقف جنبى
بتصحينى وبتفوقنى لما اغيب
عارف انك مزروع جوايا
مانت ضميرى وبرفض موتك
خليك صاحى لحد ما اموت
منصور عبد المقصود

يا ظالمة

أقسمت أن النافذة قد أغلقت
وبأن نور الشمس
أصبح لا يرى
والعاهرة
تتخفى خلف ستائر
لم تحجب العورات
ظلت ظاهرة
لم يبق شيئ عندها
لم ينتفض
الا الكرامة والشرف
وبكى الجنين
على مشارف نهدها
كيف ارتويت من السموم
حتى تبدلت الغيوم
صارت تلال مظلمة
يا ظالمة

اسمحيلى اعترض

اسمحيلى اعترض

واعلى صوتى بالهتاف
صدقينى حتى لو كان اعتراضى
فيه نهايتى مش هخاف
اللى خاف مسلمش ابدا
واللى عاش مكسبش شيئ
الحياة بتضيق عليا
والفشل أصبح صديق
العلوم هاجرت عقولها
والأمل فى النيل غريق
عشت طول عمرى مصدق
كل كدبة بتكدبيها
وأما كنت اشكى لقلبى
قلبى كان دائما يخون
ولما اعاتبه كان يقولي
اى شيئ فى الكون يهون
إلا ضحكة من عنيها
اضحكيها مرة ليا
كل ضحكك كان عليا
وأما كنتى بتحتاجينى
تبقى محتاجة لضحية
مرة محروق جوه قطر
ومرة غرقان فى السفينة
حتى لو شجعت كوره
برضه بتضحى بعنينا
وأما أبكى وأقول ف عرضك
تغضبى منا وعلينا
وتغضبى وغضبك ينادى
حسوا مرة يا خلق بينا
منصور عبد المقصود

هتصدقينى

هتصدقينى لما اقول
زعلك حبيبتى يهمنى
يا مزعلانا فوق حدود كل الزعل
يا مكسرة فينا الامانى والامل
وايه العمل لما تكون الشقلبه
منهج لأحياء الامم
واما تكون الفهلوة
ميزان ومعيار الزمم
حبة رمم
يتحكموا ف كل البشر
زى القرود مالهم عدد
بقت الحدود من غير حدود
والدود بينخر فى الجتت
ملعون ابوك يللى الفشل
قدام عنيك منهج حياة
لو شفت ناجح تقتله

مشيت

مشيت فى مشوار الحياة
ملقتش غير ضلى صديق
ف جريت ادور ع الطريق
رمالى ضلى طوق نجاه
قال الحياة مبتدى صالح مبتغاه
يا تكون حويط
يا تكون محيط
قلبك يساع الاوبئة