إملا ف كرشك
يمكن بكرة يجيلك تشبع
تصبح منبع
للأحساس
تعرف معنى تصاحب ناس
تعرف معنات كلمة صاحب
صاحبى ف ضلى
طول ما انا صادق
ليه بتزيف كل حقيقة
وبتتلون كل دقيقة
ليه عايش فى الدنيا مصالح
خليك صالح
قوم واتصالح ويه مرايتك
بص ف وشك
حاول مرة تعرف نفسك
نفسك انت
الماسك المرسوم على وشك
عامى عنيك
انزعه عنك
هتشوف خير الدنيا بحالها
وان الدنيا متسواش ابدا
انك تخسر نفس بريئة
شايفة حقايق
وانت شايفها
ومغمى عنيك
شوف ف مرايتك
بس اعكسها
هتشوف نفسك واحد تانى
تعرف انك كنت انانى
شايف نفسك
خيرك اللى بتحلف انه لغيرك
عمره ف ليلة
ما اتعداك
امتى هتعرف
ان شيطانك
عمره ما يلبس
ماسك ملاك
منصور عبد المقصود
ليست هناك تعليقات:
إرسال تعليق