بحبك 2

بحبك شطة على كشرى
ملهلبنا
ونادى الأهلى على بطال
بيغلبنا
وحكام كورة بتلعبنا
عل عيبنا
نقول برة
يقولك اصلها حمرا
فنلة عمنا الاهلى
ونور الصبح قام شقشق
على بيتنا
فبيتنا الليلة فى الشارع
فى حضن نجوم
نلاقى النجمة بصه لنا
بتتالم
وباعتة دموعها تتحايل
وتتعلم
شروط الحب مش صعبة
بحبك زحمه فى الميادين
واحبك ماشى مع مينا
نادانا حسين
شربنا الشاى معاه حلبة
وشيشة القص
بحبك زينة ع الخاتم
كأنك فص
ملح وداب فى كوباية
وكيلو دقيق
عملنا البتزا كلناها
بشطة حريق
حرامى بيسرق الشنطة
وقفناله
وسيد قام يبوس خاله
عزمنا عليه
مشى وياه وقال راجع
لكم تانى
وهانى لسة بيعانى
من الرخصة
طلب سحلب وقال ادفع
ايهاب قاله مهيش ناقصة
مينا بصله بصة
وأنا ادفع ليه
يقوله كسبتك امبارح
يرد بلاش كلام جارح
أمين الشرطة صفانى عشان رخصة
و لسة راجع لهم تانى
تهانى صابحة مدايقة
ونرجس قايمة مش فايقة
خناقة تحت باب بيتها
وعمتها تشد ف شعر جارتها
وخلتها تصوت بس حيانى
ومن تانى تقوم عاركة
ما بين عتمان مع بركة
عشان اتنين جنيه فكة
وقاله مفيش
رغيف العيش

( رمل القبر )

يا رمل القبر يا المتحنى بالحنة
ومتعطر بماء الورد
قطفنا الورد بأيدينا
وعملنالك بوكيه أحمر
وسيبنا الشوك يشوكنا
يشككنا
دفنا الورد و ضحكنا
على البور اللى طارح صبر
فوق بيتنا
اللى مجبور جبر
وفاكر انه بيغييتنا
وعتبتنا اللى لسة عنيها مكسورة
وع الصورة اللى بتخبى وراها الدم
فكون أرحم من الأرحام
وكون انسب من الأنساب
واوعى عنيك تغيب عنهم
واوعى إيدك لتجرحهم
وطبطب فوق جبين الورد بالراحة
ولو ليلة سئل إنسان
فاوعى تجاوبه بصراحه
ليقلقهم
ويحقد ع العبير اللى يفوح منهم
فيرجع لجل يزاحمهم
على الموتة
كآن الورد ب يرمرم
مشفش الشهد لما زرعه وبأيده
طرح علقم
مشفش المر خبط يوم على بيته وقاله امانه علمنى
ده مرى الليلة قام يصرخ
هرب منى
مرارى معدش ليه بيوجع
مرارك ليه صبح اوجع
يا ورد أن كنت تسمح لى
اجييب سيرتك على لسانى
وأقول للدمعه تسامحنى
انا مملكش غير دمعى
وعن دمى بملكهوش
والينا ان حب يوم ياخده
منسمحلوش
يطوف حتى ف شرايينى
شرايين الولى أوسع
كلام الاة معدش رحيب
كلام الوالى بقى ارحب
تضيق الدنيا قدامنا
فنطرد منها أخواتنا
ونحنى الكتف ونرحب
بدود الأرض
وبعنا كل ما نملك
ما عدا الشوك
و علشانه قطفنا الورد


منصور عبد المقصود الشاعر

شرقاوى

طريق وياكى ومشيته
وعقدين فل
فوق صدرك وفوق صدرى
ترجمنا الكلام بدرى
أحاسيسى و أحاسيسك
قراها كل من ماشى
ومقلناش
لَكِنْ عنينا فضحانا
وجوانا بترقد نار
فراق
جاى لينا بعد ساعات
دموع أمسحها على وشك
وأقولك دمعتك غالية
بلاش تبكى
تودّعى عينى فى الزحمة
وبلا رحمة يمر اليوم
أعاتب كل شيء فيّ
وأسمع الف أغنية
عشان طيفك يفارقنى
لكنه معايا ما يفارق
وفجاءة يرن تليفونك
عرفت أنه... من الرنة
تخصك بس ولواحدك
تصارحينى
وأنا أصارحك
أنا إحساسى
مش كداب ولا بلعب
لكن بغضب عشان فى الأصل
شرقاوى
شيطانى
مصاحبنى
يعاتبنى
يقولى البنت دى سهلة
خد بالك
طالما مسكت يوم إيدها
أكيد غيرك مسكها كتير
طالما سمعت يوم منها
فغيرك
برضه سامعينه
أرن عليكى وأتعصب
وأوجع فيكى بكلامى
وأحس بدمعة وبشهقة
أرفع أيدى وأتبسم
خلاص يعنى بقيت (أبو زيد)
واسيب نفسك بتتعذب
وتتألم وأعيش الدور
ما أنا فى الأصل شرقاوى
ودا طبعى
أعيش على جلد كل الناس
ومسمحش
لغيرى إنه
يجلدنى
دا طبع الغالب الأغلب
فصونى يا ضلتى بوحك
ولا تلومى ف يوم روحك
ما دمت عشقت شرقاوى


منصور عبد المقصود الشاعر

سحر...... مرثية فى شقيقة صديق رخمة الله عليها .....

وعشان سحر
عشقت عيونى الأمنيات
وكتبت اجمل أغنية
واتلحنت لكن وجعنى لحنها
غنى القمر على حسنها
وسألت مداح القمر
كانت هنا
بتزف لينا الفرح
نفرح
نبتسم
ايه اللى خلا الأغنية
بطعم المرار
يا مسكرة
سقتينا ليه مر الفراق
والحضن رافض يحضنك
فى عز شوقى بقيت بخاف
لما شالوكى ع الكتاف
واتعطرت
كل الشوارع واحنا رايحين ندفنك
يا نبض رافض نبضها
يا فرحة رافضة سكتى
مين اللى سبب محنتى
ونده على المرض اللعين
قفل العيون الطبية
يا سوسنة
مالت على عود الريحان
طرحت أدان
وصلاة فى بيت الطيبين
مين اللى اهداكى المرض
وكتب علينا نفترق
قبل الأوان
منصوب فى احشانى الصوان
ورفضت أقبل يوم عزا
منصور عبد المقصود

حبيبتى

وبحق كل المرمطة
والشعبطة
وأحوال حبيبتى المحبطة
وعيون جيرانى
الساخطة
على مشيها المعجون عوج
وبحق حلمى اللى اتعوج
وحدف شمال
لأحلف عليكى ميت يمين
وأسوق عليكى الميتين
وأعمل ليلاتي فى حبها
الفين عمل
وبحق كل البهدلة
والدهولة
والهرولة
ورا لقمة العيش اللى متشبع جنين
لأزرع على أرضك حنين
وأسقيه بدم الأوردة
علشان ميطرحلك قلوب
متشعلقة
على بابك المصلوب تعب
وأغّسْلِكْ
وأهَنْنِكْ
وأهدهدك
من غير عتب
وأعدم دموعى وكل لحظات الغضب
وأرسم على عيونك فرح
وأحلف بأن الخير طرح
وعلىّ كفارة اليمين
ولا تزعليش
ولا تغضبيش
وإن يوم سألتك عن سبب
متجاوبينيش ع الأسئلة
منصور عبد المقصود الشاعر

السبع العجاف

يا حلوة وإنت مروحة بالليل
غنى القمر
على حُسنْ بادى ف خطوتك
لمى الغناوى ف مشيتك
ورّقْصىِ قلب الجدع
الحزن كلبش جتته
سرقت خدودك دمعته
لما ضرب قلب الودع
ورماكى بالسبع العجاف
رابطين على بطنك حجر
لما فتحلك مندله
كل اللى كان عايش فى روحه بيشبهك
بقى يشبهه
الطيبة والروح الأبية فى منظره
بتدارى نار
عايشة بتحضن جوهره
يا شمس قومى واِلْسَعى كتف الولد
وهزهزى ضهره اللى صابح منحنى
إوعى رقبتك تنتنى
يا حافر النور فى الضلام
يا راسم الوردة على جدار الألم
أصرخ ووبخ فى التلم
اللى سقاه الليل برود
فين لما كان حاكمك أسود
يا خالقة ميت مليون غنى
متصدقيش الأغبيا
ولا تسمعيش للأوليا
اللى ولائهم بالإيجار
واللى باعوكى بالدينار
رسموا على قلبك جدار
سهمين بدون حرفين رشق
واحد فى عين كل اللى باع
وواحد فى عين المشترى
يا نسمة صابحة بتلعنى
لا تلعنى
هى حدودهم ضيقة
عايشين حياة من غير أُفقْ
مشفوش ملوك وبتنحنى على باب جلالتك يا هرم
ولا شافو بّنّا يوم بَنَى فى أرض النبى والمكرمة
ولا شافو مليون اجنبى
عايشين فى حضن الأعمدة
وأنا فى انتظارك تندهى
والكل هيلبى الندا
كل اللى باعك بالدولار
واللى منع عنك سولار
مصيره ضرب الأحذية
منصور عبد المقصود

صباح الألم ............

بحق اللى بينى وبينك يا أمى
تقاومى الألم
ده ربك وربى خلق
من عدم
وقالى حنانك كمال النعم
منيش عمرى رافض عياكى يا أمى
لكن كل رفضى أشوف دمعتك
يا راسمة إبتسامة على شفتك
تخبى وراها الآم السنين
مريضة يا أمى
دواكى منين
يا ريت كل دمعة تخاصم عيونك
تصالح عيونى
ياريت كل حضن إحتوانى فى سنينى
يطول سنينك
بحق اللى بينى وبينك يا أمى
تخفى عشانى
وأنا أسهر وحضنى يِكتِف مشاعرك
أمانة يا أمى تصونى العشم
وتدى بكفك عياكى الرخم
يا قائد سفينة نضال الغلابة
وجودك بيغلب نباح الديابة
يا أجمل ورودي اللى باقية فى غابة
سنينى اللى باقية ... أبيعهم بكام ؟؟
ويفضل وجودك يزِِين المكان
يا سيدنا الملاك اللى حاضر بسرعة ... تلبى الندا
متيجى براحتك .... مهيش م العدا
بفكر سموك بأن اللى الأصيلة
دى ضحت كتير
مكنش فى رصيدك .. (حسابك يا أمى )..
غير الضمير
تبصى ف عيونى وأبص ف عيونك ...
تقولى منين
أقولك دا ضهرى اللى لساه بيسقى ... ف ضلوعى الآلم
تشيلى منابى وأنا ف غربتى ... وأقولك حرام
وأسمع دموعك وأنا بأتصل فى
وسط الكلام
تقوليلى أرجع ... أقولك ده شغلى
تقولى جعانة يا واد
أحضنك
وملس بإيدى على شعر راسك
وأقول رقوتك
مترجع أمانة عشان بس نفسى
أشوف خلفتك
أقولك عيونى ..
وأهجر مشاغلى وأجيلك هوا
وأنام تحت رجلك ونضحك سوا
عيالى منشفت دموعهم عليكى
(أحلام) .. الحزينة
(جنى ).... ال مش سليمة
و(عبده) بينزف عليكى الوجع
وأنا حضنى يائس
مهواش سايعهم
أنا حضنى عاجز
يطيب خاطرهم
أمانة يا أمى تجينى ف منامى
وأنا فى أنتظارك
وقولى إن جارك
سيدنا المصطفى
وإنك وأبويا بتبنوا عشانى
قصر بتحف
ونادى يا أمى
أكيد هتلاقينى
هنيم عيالى وأجيلك شغف
نكمل كلامنا
اللى بينى وبينك
ونبعت رسائل لكل الحبايب
ونمسك بأيدينا اليمين الصحف
منصور عبد المقصود

السحابة الطيبة

فايته السحابة الطيبة
فوق نجع ناسنا الطيبين
شايله على اكتافها الندى
رافعين أيديهم للسما
قال الإمام
يا من خلقت المبتدا
والمنتهى
أروى حياتنا من العطش
أمن وراه الصالحين
فنزل مطر
وغسل ذنوب الأضرحة
صعدت ذنوب الأوليا
تنزل امان على أمن ماشى فى سكتك
فأشكر تجيلك نعمتك
ودى فرصتك
قبل السحابة الظالمة متجيب أسى
وتجيب سيول على روس بناتنا العطشانين
العاشقين
للى ابتدع
والحافظين كل البدع
والكارهين المسألة
واليائسين من حلها
شايلة البنية بنتها فوق كتفها
قامت السحابة الظالمة
ضاربه السحابة الطيبة
على قلبها
برقت دموع على صاعقه
قتلت بنتها
من حزنها
بكت العيون الحانية حبة دموع على شكل سيل
لما هابيل
رفض أنه يهرب من قضاه
وسلم حياته لقتلها
كان اليقين
أن اللى بينو وبين قابيل
أكبر كتير
من أنه يتلوث بدم
لكن الشيطان مخلوق ومن بدء الزمان علشان يبرر له الغلط
طب ليه هابيل مدافعش عن حق الحياة ؟؟
وسلم مصيره للشيطان
معقول هابيل كان شيئ جبان ؟؟
والا الحياة للأوليا وجهة نظر
انظر بعين فيها النظر
هتشوف عبر
واللى اعتبر
مات بس موتة راضية

ريم

والريم تبكى
فى السماء دموعها
تكوي جبين العاشقين
الحالمين
الواقفين
على الصراط
مازال ثوبى طاهرا
متفردا
مازال عصفورى الحزين
مغردا
انا من قتلت الحزن
كيف قتلتنى
وانا الذى
احييت كل العازفين
على وتر
واذا المخاطر تشتكى
واذا الخطر
يركع امام دموعها
بالله كيف لطمت خدا لم يزل
يتلقى الاف القبل
بالله لم تعبد هبل
ان الملائك تستحى
من دمعها
وتزيل اثار الدموع
بخدها
لكنها
تأبى الحقيقة ان تعود
والبدر يرفض ان يجود
بمثلها
يا ريم انى قد بكيتك
عامدا
متعمدا
فلترحمى قلبا بكى
ولتأمرى صوت النحيب
لينجلى
انا ما عرفتك من قريب
او بعيد
لكن عرفتك فى الخبر
كنت الرسول المنتظر
كى تحملى عرش
الكؤوس
ولتنخفض كل الرؤوس
الشامخات
ما زلنا نقطف الازهار
بأيد العابثين
والعابثات
مازلنا ندفن فى التراب الامنيات
مازلنا نرقب ان تعود
الاغنيات
ونقيم صرحا من دعاء
لكنها
ابدا وابدا لن تعود

وطن غريق

وأدى الزمان

شاهد عليكى فى محنتك

مين اللى إمبارح دفع

وحصاده منك قسوتك

فمتضغطيش بالشكل ده

مبقاش بيملك غير قرار

والكورة لسة ف ملعبك

متكسريش قلب الجدع

مبقاش فى شيئ ماسكه بأيديه

طعم البكى

فى الحلق متعود عليه

كان بين عينيه

يختار نعيم

يختار سكوت

لكنه اختار الغلط

الوقفة فى وش الرماد

اختار يموت

علشان ما يوهبلك حياه

فمترقصيش

دم العيال الميتين رافض يئن

ومتسمحيش للى بيعزف ع الوتر

انه ينشذ غنوتك

صوت الغناوى بيألمك والناى حزين

فوق الجبين

متجمعين حبة دموع

بس اللى شافهم قال عرق

النبض لسه بيتحرق

من قلب ناسنا الطيبين

مركب بيهرب م الغرق

أحلام كتير وبتنسرق

وشهيد ييندهله شهيد

انا حامى طولها وعرضها

وأنا صيد لنيلها وبحرها

فرت علينا الدمعتين

والدفنة كانت ع الملاء

أعمار كتير وبتنسرق

يا عايشه فى القصر الرشيد

غطى بجريدك ع الجدع

بخته اللى مال لما سأل

فى الكون شوية اسءلة

ايه اللى يفرق بين وطن حر ورشيد

وما بين كفن
منصور عبد المقصود

عشانك عفيفة

عشانك عفيفة

عشان ما انت طاهرة 
وشريفة 
وعفيفة 
عشانك نظيفة 
عشان طول حياتك 
مكافحة وصبورة
عشان ليكى راجل 
يخاف م الحرام
وضابط حياته بوقت الأدان 
هيتقال عليكى
كتير الكلام
لو قالوا غرورك 
فمعناه حياءك 
لو قالوا عبوسك 
عشان انت راجل 
وهتموتى راجل 
فسيبي المياعة 
لأهل المياعة
وسيبى النطاعة 
لأهل النطاعة 
وسيبى البضاعة 
الرخيصة عشانهم 
وصونى بضاعتك
ولو كلموكى أهل الوضاعة 
سكوتك رصاص 
بيحرق صدورهم 
ويطفى اللى باقى 
شوية ف نورهم
فاوعى تراضيهم 
رضاهم هلاك
مهوماش ملايكة 
ولا شيوخ طريقة
ميسكن قلوبهم 
غير الحريقة
على كل ناجح 
نجاحك فى دينك 
ثماره ف عيالك 
وحق اللى سالت عليهم دموعك
حبابيبك
بجد
ميكون اعتبارك فى مرة
لحد
ميعرفش معنى الرجولة 
الحقيقة 
هيبيعك فى ثانية 
كتيرة الدقيقة
اقولك حقيقة 
مستمعيش فى ليلة لكتير الكلام
قليل فى فعله 
وزكره حرام
ده لو مش حرام 
احكيلك تاريخه

طفلى

طفلى

لى طفل يسألنى كثيرا
أين الحق ؟
وأين الباطل ؟
وكيف لطفل مات قتيلا ؟"
أن يقتل من أجل الحق ؟
قال الطفل
كيف لطفل مات غريقا
أن يقتل بأسم الإيمان
من حلل قتل الإنسان ؟؟
السلطان ؟!
لا يعبأ بسقوط القتلى
طفل كان
إمرأة حبلى
شاب
يحمل بين يديه كتابا
شيخ
قاد الناس إماما
وفتاة
فى ثوب العفة
تحمل تمرا
كى تقتات
السلطان
لا يبكى
على رجل مات
ما دام الكرسى سعيدا
(وحريم السلطان ) تغنى
مادامت
أنوار البهو الملكى
تتلألأ نورا ذهبيا
مادامت
تأتيه الأبكار عشيا
سيظل السلطان فتيا
ما بقى الفرسان ديوكا
يحمى دجاجا
يرقد دوما فوق البيض
كى ينجب دوما صيصان
تشبه أطفال
مدينتنا
مادامت
مادامت
مادامت
منصور عبد المقصود الشاعر

عنترة

يا عنترة
عبلة تبالغ فى الغضب
ما عاد يحلو ذكرها
فى اى أبواب الادب
ما عاد يجدى عبلتك
نصحا صديقى
ولا عتب.
صارت عناقيد الغضب
فى صمتها
تقتل سحابات المطر
الكل أصبح فى خطر
منذ اندلاع الليل فى ثوب النهار
هجر الحمام مدينته
مازال يبحث عن بديل لعبلته
فالكل عبلة والمغادر عنترة
منصور عبد المقصود الشاعر

القلم

رفض القلم يكتب حروفى
وأنا من كسوفى
قصفت سنه
نزف الوجع فوق الورق
أهدرت دمه
لو كان يهمه
كانت حروفه تشبهك
وتداوى جرح المكسورين
لكن عنيه
شايفة الحقايق كلها
ورافضه تكتب حرف حق
ولا مره قلت لظلم لأ
منتاش قلم
زارع فى قلب النور الم
عاشق تمجد كل زيف
يا قلم سخيف
تعشق تبيع حبر الوجع
كل اللى مستنى اتوجع
دمعة حروفك / تحبس رجال
تشنق مرابط ع الحدود
أرض الجدود
راحت بامضة حضرتك
حتى اليهود
الوعد كان من فكرتك
فكرة تموت الف جيل
وما زلت عايش ع الورق
يا أيها القلم النحيف
خليك نظيف
فرحنى يوم بتمردك
رجع حقوق الميتين
داوى جروح المجروحين
كل الدموع النازفة
على بحر الهموم
نازلة بتلعن حضرتك
منصور عبد المقصود الشاعر

المحترم

وحلمت انى فى يوم هكون
او لن أكون
مش مشكله
الكون بحاله معجزه
ومْعَُُجِزه البنت الولد
بين كل حاسد تلقى ألفين محسودين
مع كل حاقد الف نار وبتندلع
بين الصحاب
يحلى العتاب
لما تكون الصحبة صحبه نور وحق
بس اللى دق
آسفين غلط
واللى الكلام خانه اختلط
حدف ظلط
فاترد له تانى الكلام
حبة سهام متنشنه
والبنت ساكنه ف حيهم
والحى حكماه الحريم
بس اللئيم
غمس رغيف العيش ف دود
الدود طلع
من زلعه سودا معتقه
واترستقت جوه الدولاب
حبة هدوم متخرمة
البدلة عنده محرمه
مع انه يملك حتتين
جزمه وشوز
اراجوز بيبكى
يضحك عليه كل العيال
مليون سؤال
ومفيش إجابة محدده
دى قصيده اصلا متساويش
حبر الورق
لكن مصيرنا نفترق
واللون هيجمع صحبته
تلقى الخسيس
ويه الخسيس
والمحترم قاعد معاه المحترم
والكاس يدور
فاشرب كتير
الزير مزعل قلته
من فرحته
منع العيال تشرب معاه
الزير خلص والمية فى ايدين العيال
كبروا قوى
واللعبه قانونها فى ايديك
لكن عنيك
ضحكت عليك والكرسي لا يمكن يدوم
لو عمره دام
موصل إليك
يا محترم
منصور عبد المقصود الشاعر

كانت

كانت بتعشق مصحفه
وتخرجه من شنطته
لما بيرجع من هناك
شكل الملاك
عمر الأجازة قصيرة
عاشت كتير متحيرة
أخده ف حضنى
والا اسيبه للصحاب
مكنتش لاقيلها جواب
غير انها
عايشة عشانه التضحية
أفرح حبيبى
الفرح على شانك امل
شيفاك
فى بكرة المحتمل
والدنيا مش سايعة حبيبى
خطوتك
تربيتك
حتى علامك معجزة
مزعلش منك يوم ابوك
كل اللى كان ليهم معاك ذكرى
حبيبى بيحسدوك
عايش فى وسط الناس علم
عمرك ما سببت الالم
والليلة ضمت مصحفه
على صدرها
كل الدموع المتحاشين
ليوم الفرح
نازلين سيول على خدها
الليلة دى مجاش ابنها
راجع لواحده مصحفك
غرقان بدم
ابنى اللى وهباه للوطن
راجع شهيد
المشكلة ان الولد
مدخلش حرب
فيموت هناك بأدين عدو
كل الولاد اتعلموا ان العدو
بره الجدود
حتى الجدود
كانت حكاويهم كده

منصور عبد المقصود

يا بكرة

يا بكره وانت جاى
هاتلى معاك فرحة
تمسح دموع العين
وتصالح الخدين
عل البسمة والضحكه
هاتلى معاك شمعه
تنورلنا الضلمة
لو حتى نورها ضعيف
الهم أصبح ضيف
لكن تقيل الدم
فاقد لاحساسه
ميهموش الطفل
ولا حتى بنوته
سرحانه بتغنى
يا أمنا الغولة
وديتى فين بكره
سمعنا زغروته
فى بيوت مليها جراح
ع اللى حبيبهم راح
ولا سبش عنوانه
الورد ليه دبلان
يا بنت على خدك
مين كان زمان قدك
يا اجمل التصاوير
شعرك ده والا حرير
علمتى قلبى يغير
وأنا عمر قلبى ما حب
بس ما شافك دب
وسمعت دقاته
يا معنى لحياته
منصور عبد المقصود

صورة وطن

لساك بتحفر فى الضمير
عمال تدور عن وطن
نام الوطن فى عيون صغار
راسمين على قلب الجدار
صورة علم
الفل اول لون على قماشه الحرير
أسود على كل اللى مات فيه الضمير
احمر بلون الدم فى عيون الطغاة
عاش الولد واهتم
يقلع جزور الهم
من فوق جبينك يا وطن
طافح على جبينهم عرق
لما اتسرق
حبات تراب
رجع التراب ممزوج بدم
دم اللى عايش يحرسك من غير سلاح
الفجر لاح
نادى الإمام
ساوو الصفوف
توابيت ألوف
مترصصين
علشان متمسح دمعتك
ملايين بشر واقفين فى خدمة حضرتك
والبدر رافض يكتمل
شايف فى بكرة المحتمل
سرطان معشش فى الأمل
قالوا العمل
ف ايدين شباب
وأصغر شبابك شعره شاب
لما انحنى
أكبر هرم
يوم ما اتوجع
فيك الضمير
افرد شباكك يا وطن
نام العطن جوة القلوب
الضحكة مرسومة على وش الجدار
علشان ميحفظها الصغار
ويعيشوا دايما فى انتظار
انك تعود
تضحك لهم
ويشوفوا فى عنيك النهار
منصورعبدالمقصود

انا انسان

انا انسان
وحلمى انى اعيش فى امان
وامتى يا دنيتى امتى
تحنى فى ليلة ع الغلبان
وامتى يكون لنا فيكى
صدر حنون
منيش جاحد ولا فرعون
لكن بحلم وكل منايا
اعيش انسان
اعيش انسان

الديك

وغنى الديك على سطحى
رد عليه ديك امك
لكن ديكى مهوش سافل
ولا كنش فى ليله ابيح
فربى يا صاحبى ديك امك
وقوله بلاها م التجريح
لسان ديكى مهوش عاجز
وديك امك لسانه طويل
واوعى يا صاحبى من التأويل
انا ديكى بحق اصيل
وديك امك ملهوهش مثيل
من الخسة ولا التضليل
وديكى يقوم صلاة الفجر
وديك امك متعرفلو نهار من ليل